نہ آیا ہوں نہ میں لایا گیا ہوں
میں حرفِ کن ہوں فرمایا گیا ہوں
میری اپنی نہیں ہے کوئی صورت
ہر اک صورت سے بہلایا گیا ہوں
بہت بدلے میرے انداز لیکن
جہاں کھویا وہیں پایا گیا ہوں
وجودِ غیر ہو کیسے گوارا
تیری راہوں میں بے سایا گیا ہوں
نجانے کون سی منزل ہے واصف
جہاں نہلا کے بلوایا گیا ہوں
پتا پتا بوٹا بوٹا حال ہمارا جانے ہے
جانے نہ جانے گل ہی نہ جانے باغ تو سارا جانے ہے
اک دیا دل میں جلانا بھی بجھا بھی دینا
یاد کرنا بھی اُسے روز بھلا بھی دینا
کیا کہوں یہ مری چاہت ہے کہ نفرت اُس کی؟
نام ِلکھنا بھی مرا لکھ کے مٹا بھی دینا
پھر نہ ملنے کو بچھڑتا تو ہوں تجھ سے لیکن
مُڑ کے دیکھوں تو پلٹنے کی دعا بھی دینا
قریب آ کر نظر ڈالی تو اک تصویر گم نکلی
تمنا دور سے کتنی حَسِین معلوم ہوتی ہے
رات یوں دل میں تری کھوئی ہوئی یاد آئی
جیسے ویرانے میں چپکے سے بہار آ جائے
جیسے صحراؤں میں ہولے سے چلے باد نسیم
جیسے بیمار کو بے وجہ قرار آ جائے
یا تیرا تذکرہ کرے ہر شخص
یا کوئی مجھ سے گفتگو نہ کرے
اس نے اچھا ہی کیا حال نہ پوچھا دِل کا
بھڑک اٹھتا تو یہ شعلہ نہ دبایا جاتا
عشق سنتے تھے جسے ہَم وہ یہی ہے شاید
خود بہ خود ہے دِل میں اک شخص سمایا جاتا
ارمان بیچتا ہوں میں اعلی معیار کے
اس کاروبار میں دِل میرا خود کفیل ہے