مواد پر جائیں
SadPoetry
جب ترا حکم ملا ترک محبت کر دی — احمد ندیم قاسمی

جب ترا حکم ملا ترک محبت کر دی

احمد ندیم قاسمی غزل 7 اشعار
  1. جب ترا حکم ملا ترک محبت کر دی دل مگر اس پہ وہ دھڑکا کہ قیامت کر دی

  2. تجھ سے کس طرح میں اظہار تمنا کرتا لفظ سوجھا تو معانی نے بغاوت کر دی

  3. میں تو سمجھا تھا کہ لوٹ آتے ہیں جانے والے تو نے جا کر تو جدائی مری قسمت کر دی

  4. تجھ کو پوجا ہے کہ اصنام پرستی کی ہے میں نے وحدت کے مفاہیم کی کثرت کر دی

  5. مجھ کو دشمن کے ارادوں پہ بھی پیار آتا ہے تری الفت نے محبت مری عادت کر دی

  6. پوچھ بیٹھا ہوں میں تجھ سے ترے کوچے کا پتہ تیرے حالات نے کیسی تری صورت کر دی

  7. کیا ترا جسم ترے حسن کی حدت میں جلا راکھ کس نے تری سونے کی سی رنگت کر دی

تصحیح بتائیں

احمد ندیم قاسمی کا مزید کلام

تمام کلام