Skip to content
SadPoetry
EN
Har ek baat pe kahte ho tum ki tu kya hai — Mirza Ghalib

Har ek baat pe kahte ho tum ki tu kya hai

Mirza Ghalib Ghazal 10 couplets
  1. Har ek baat pe kahte ho tum ki tu kya hai Tumheen kaho ki ye andaz-e-guftugu kya hai

  2. Na shoale mein ye karishma na barq mein ye ada Koi batao ki wo shokh-e-tund-khu kya hai

  3. Ye rashk hai ki wo hota hai ham-sukhan tum se Wagarna khauf-e-bad-aamozi-e-adu kya hai

  4. Chipak raha hai badan par lahu se pairahan Hamare jaib ko ab hajat-e-rafu kya hai

  5. Jala hai jism jahan dil bhi jal gaya hoga Kuredte ho jo ab raakh justuju kya hai

  6. Ragon mein daurte phirne ke ham nahin qaail Jab aankh hi se na tapka to phir lahu kya hai

  7. Wo cheez jis ke liye ham ko ho bahisht azeez Siwaye bada-e-gulfam-e-mushk-bu kya hai

  8. Piyun sharab agar khum bhi dekh lun do-char Ye sheesha o qadah o kooza o subu kya hai

  9. Rahi na taqat-e-guftar aur agar ho bhi To kis umeed pe kahiye ki aarzu kya hai

  10. Hua hai shah ka musahib phire hai itrata Wagarna shahr mein 'ghalib' ki aabru kya hai

Report a mistake

More by Mirza Ghalib

All poems