Skip to content
SadPoetry
EN
Dil-e-nadan tujhe hua kya hai — Mirza Ghalib Sabza o gul kahan se aaye hain - Mirza Ghalib

Dil-e-nadan tujhe hua kya hai

Mirza Ghalib Ghazal 11 couplets
  1. Dil-e-nadan tujhe hua kya hai Aakhir is dard ki dawa kya hai

  2. Ham hain mushtaq aur wo be-zar Ya ilahi ye majra kya hai

  3. Main bhi munh mein zaban rakhta hoon Kaash poochho ki muddaaa kya hai

  4. Jab ki tujh bin nahin koi maujood Phir ye hangama ai khuda kya hai

  5. Ye pari-chehra log kaise hain Ghamza o ishva o ada kya hai

  6. Shikan-e-zulf-e-ambareen kyun hai Nigah-e-chashm-e-surma sa kya hai

  7. Sabza o gul kahan se aaye hain Abr kya cheez hai hawa kya hai

  8. Ham ko un se wafa ki hai ummeed Jo nahin jante wafa kya hai

  9. Haan bhala kar tira bhala hoga Aur darvesh ki sada kya hai

  10. Jaan tum par nisar karta hoon Main nahin janta dua kya hai

  11. Main ne maana ki kuchh nahin 'ghalib' Muft haath aaye to bura kya hai

Report a mistake

More by Mirza Ghalib

All poems