حق دا نعرہ وَجنا حق اے

Haq-Da-Naara-punjabi shayari

حق دا نعرہ وَجنا حق اے
ظالم اَگے گجنا حق اے

چُپ جے سادھی جابر اَگے
تِیر تینوں وی وَجنا حق اے

یتیماں دا جے پِنڈا ڈھکیا
فیر تیرا وی سجنا حق اے

گیم شو وِچ کاراں ونڈن
دِھی ماڑے دی کجنا حق اے

گوانڈھی جے نہیں بھُکھے سُتے
بندیا تیرا رجنا حق اے

جے توُں ماپے راضی رکھے
سجناں دا وی سجنا حق اے

مار کے بندیا حق کسے دا
جے کریں تُوں حج، ناحق اے

(طارق اقبال حاوی)

Subscribe
Notify of
guest
0 Comments
Inline Feedbacks
تمام تبصرے دیکھیں