The ghazal
Read it in Urdu script-
Hazaron khwahishen aisi ki har khwahish pe dam nikle Bahut nikle mire arman lekin phir bhi kam nikle
-
Dare kyun mera qatil kya rahega us ki gardan par Wo khun jo chashm-e-tar se umr bhar yun dam-ba-dam nikle
-
Nikalna khuld se aadam ka sunte aaye hain lekin Bahut be-aabru ho kar tire kooche se ham nikle
-
Bharam khul jaaye zalim tere qamat ki darazi ka Agar is turra-e-pur-pech-o-kham ka pech-o-kham nikle
-
Magar likhwaye koi us ko khat to ham se likhwaye Hui subh aur ghar se kaan par rakh kar qalam nikle
-
Hui is daur mein mansoob mujh se bada-aashami Phir aaya wo zamana jo jahan mein jam-e-jam nikle
-
Hui jin se tawaqqo' khastagi ki daad paane ki Wo ham se bhi ziyada khasta-e-tegh-e-sitam nikle
-
Mohabbat mein nahin hai farq jeene aur marne ka Usi ko dekh kar jeete hain jis kafir pe dam nikle
-
Kahan mai-khane ka darvaza 'ghalib' aur kahan waaiz Par itna jante hain kal wo jaata tha ki ham nikle
