The ghazal
Read it in Urdu script-
Tohmat-e-chand apne zimme dhar chale Jis liye aaye the so ham kar chale
-
Zindagi hai ya koi toofan hai Ham to is jeene ke hathon mar chale
-
Kya hamen kaam in gulon se ai saba Ek dam aaye idhar oodhar chale
-
Dosto dekha tamasha yaan ka sab Tum raho khush ham to apne ghar chale
-
Aah bas mat ji jala tab janiye Jab koi afsun tira us par chale
-
Ek main dil-resh hoon waisa hi dost Zakhm kitnon ke suna hai bhar chale
-
Sham' ke manind ham is bazm mein Chashm-tar aaye the daman-e-tar chale
-
Dhoondhte hain aap se us ko pare Shaikh sahab chhor ghar bahar chale
-
Ham na jaane paaye bahar aap se Wo hi aare aa gaya jeedhar chale
-
Ham jahan mein aaye the tanha wale Saath apne ab use le kar chale
-
Jun sharar ai hasti-e-be-bood yaan Baare ham bhi apni baari bhar chale
-
Saqiya yaan lag raha hai chal-chalaw Jab talak bas chal sake saghar chale
-
'dard' kuchh ma'loom hai ye log sab Kis taraf se aaye the keedhar chale
