Skip to content
SadPoetry
EN
Duniya ke sitam yaad na apni hi wafa yaad — Jigar Moradabadi

Duniya ke sitam yaad na apni hi wafa yaad

Jigar Moradabadi Ghazal 9 couplets
  1. Duniya ke sitam yaad na apni hi wafa yaad Ab mujh ko nahin kuchh bhi mohabbat ke siwa yaad

  2. Main shikva ba-lab tha mujhe ye bhi na raha yaad Shayad ki mire bhoolne waale ne kiya yaad

  3. Chhera tha jise pahle-pahal teri nazar ne Ab tak hai wo ik naghma-e-be-saz-o-sada yaad

  4. Jab koi haseen hota hai sargarm-e-nawazish Us waqt wo kuchh aur bhi aate hain siwa yaad

  5. Kya janiye kya ho gaya arbab-e-junun ko Marne ki ada yaad na jeene ki ada yaad

  6. Muddat hui ik hadsa-e-ishq ko lekin Ab tak hai tire dil ke dharakne ki sada yaad

  7. Haan haan tujhe kya kaam miri shiddat-e-gham se Haan haan nahin mujh ko tire daman ki hawa yaad

  8. Main tark-e-rah-o-rasm-e-junun kar hi chuka tha Kyun aa gai aise mein tiri laghzish-e-pa yaad

  9. Kya lutf ki main apna pata aap bataun Keeje koi bhooli hui khaas apni ada yaad

Report a mistake

More by Jigar Moradabadi

All poems